KASETA KOMA NAVÎN DERKET

Koma Navîn ku li Colemêrgê xebatên muzîkê dimeşîne, bi etîketa Huren Prutoksiyonê albûma xwe ya yekem derxist. Koma Navîn di albuma xwe ya bi navê "Jiyanek Nû" ya dê ji aliyê Kom Muzîkê ve bê belavkirin de, ji çanda Colemêrgê sûdeke mezin girtiye. Koma Navîn ku ev 18 sal in li herêmê muzîkê çêdike û beşdarî gelek mihrîcan û bernameyan bûye, ev demeke dirêj bû li ser albumê xebatên xwe dimeşand. Ji endamên komê Fuat Ege, diyar kir ku bi muzîka çêdikin dixwazin xebatên çand û hunerê yên li herêma Colemêrgê derxin ber çavan û anî ziman ku di bin şertên gelekî zehmet de li Colemêrgê xebatên xwe didomînin. Ege, derbirî ku di bin banê NÇM`a Wanê de xebatên xwe didomînin û destnîşan kir ku ji niha û pê de jî dê bi biryariyeke mezin xebatên xwe bimeşînin.

Li herêmê yekem e

Fîkret Kaval jî, daxuyand ku ev 18 sal in bi 5 kesan xebatên xwe dimeşînin û bilêv kir ku tenê   daxwaza wan ew e ku çanda heyî ya Colemêrgê bigihînin pêşerojê. Kaval, anî ziman ku berî niha li Colemêrgê û derdora wê beşdarî konser, Newroz, bernameyên 8`ê Adarê bûne û wiha got: "Ev ji bo me xebateke girîng bû. Li herêmê jî yekem e."
Di albuma Koma Navîn de 12 stran cih digirin. Herêm, xweza, jiyana rojane, êş û awazên gel di straran de tê ziman. Strana herî sereke jî strana ku ji ber çîrokek li gundê Talêya Colemêrgê   qewimiye hatiye çêkirin a bi nav "Loriya Mendelî" ye. COLEMÊRG

azadiyawelat.com